काठमाडौं । नेदरल्यान्ड्सविरुद्धको विश्वकप लिग २ क्रिकेट खेलमा नेपालले पहिला फिल्डिङ गर्ने भएको छ । नेपालले शनिबार त्रिवि क्रिकेट मैदानमा टस जितेपछि नेदरल्यान्ड्सलाई पहिला ब्याटिङका लागि बोलाएको हो ।

नेपाल बिहीबार नामिबियाविरुद्ध पहिलो खेलमा अप्रत्यासित रुपमा ४ विकेटले पराजित भएको थियो । नामिबियाले टस जितेपछि ब्याटिङका लागि आएको नेपाल १ सय ३२ रनमा अलआउट भएको थियो । त्यही भएर नेपालले नेदरल्यान्ड्सविरुद्ध पहिला फिल्डिङ गर्ने निर्णय गरेको छ ।

नेपाली टोलीमा दीपेन्द्रसिंह ऐरी फर्किएका छन् । इन्टरनेसनल लिग ट्वान्टी-२० मा गल्फ जायन्ट्सबाट सहभागी हुन दुबई जाँदा दीपेन्द्रले नामिबियासँगको खेल गुमाएका थिए । उनले पवन सर्राफको स्थान लिनेछन् । त्यस्तै देव खनाललाई करण केसीको स्थानमा खेलाइएको छ ।

नेपालको प्लेइङ ११ मा सोमपाल कामी र गुल्शन झामात्र सिमरको रुपमा रहने छन् । रोहित पौडेलको कप्तानीमा रहेको नेपालको प्लेइङ ११ मा कुशल भुर्तेल, आसिफ शेख, अनिल शाह, देव खनाल, भिम सार्की, कुशल मल्ल, दीपेन्द्र, सोमपाल, गुल्शन र ललित राजवंशी रहेका छन् ।

नेदरल्यान्ड्समा पनि रोफेल भान डेर मर्वी रहेका छैनन् । इन्टरनेसनल लिग ट्वान्टी २० मा खेलिरहेका उनको टोली दुबई क्यापिटल्सले शनिबार फाइनल खेल्दै छ ।