कैलाली । कैलाली जिल्लाके कैलारी गाउँपालिका महिला बालबालिका तथा जेष्ठ नागरिक शाखासे पालिकाके ७ ठो वडाके ५१ जनहनहे शैक्षिक सामग्री वितरण कैगिल बा ।

शाखासे अभिभावक विहिन टुहुरा बालबालिका, अतिसीमान्तकृत बालिकाहुकनहे शैक्षिक सेवामे अभिवृद्धि ओ पह्राईहे निरन्तरता डेहक लाग शैक्षिक सत्रके सुरुवाटमे उ सामग्री हस्तान्तरण करल शाखा प्रमुख बालकुमारी चौधरी बटैली ।

शैक्षिक सामग्री वितरण अधिकाँस बालबालिका अभिभावक विहिन, अतिसीमान्तकृत बटै, उहाँ कहलै, अभिभावक नैरहल कारण पह्राई बञ्चित नहोइट कहिके सामग्री वितरण करल हुई ।

कैलारी गाउँपालिका वडा नम्बर ४ के वडा अध्यक्ष ठागुराम चौधरीके अध्यक्षतामे हुइल कार्यक्रममे उहाँ अभिभावक नैरहल बालबालिकाके लाग गाउँपालिका स्थानीय तह अभिभावक हुइना कहटी शैक्षिक सामग्री वितरण करल बटैली यिहे ओइनहे पह्राईमे निरन्तरतामे सहयोग पुग्ना बटैलै । बालबालिका कच्चे माटी रहल कहटी अभिभावक विहिन लर्का जहँ बटै ओइनके मजासे रेखडेखा कैना आवश्यक करलबेला पालिका सहयोग कैना बटैलै ।

कार्यक्रममे वडा नम्बर ६ के अध्यक्ष प्रेम बहादुर चौधरी पालिकाके यी शाखा वितरण शैक्षिक सामग्री बरसभर पुग्ना बटैलै । उहाँ कहलै, बहुट जैसिन बालबालिका शैक्षिक सामग्री नैहोके विद्यालय छोरेपरठिन उ अवस्था नआए कहिके यी यी सामग्री हस्तान्तरण करल हो । कार्यक्रममे पत्रकार उन्नती चौधरी शाखासे उत्कृत कार्य करल बटैली ।

शैक्षिक सामग्री वितरण कार्यक्रममे वडा नम्बर ३ के कार्यवाहक अध्यक्ष किसुनलाल चौधरी, वडा नम्बर १ के वडा सदस्य शिकारी चौधरीलगायत अभिभावक, पालिकामे गठन हुइल यूवा संजालके सहभागिता रहे । शाखासे पालिकाके वडा नम्बर ७ ओ ८ के बाँकी रहल बालबालिकाफे शैक्षिक सामग्री वितरण कैना जनैले बा । उ बालबालिकाहुकनहे काँपी, डटपेन, पेन्सिल, झोलालगायतके सामग्री वितरण करल रहे । पहुरासे ।