कैलाली । कैलालीमा बाढीले नागरिकको जनजीवनमात्र होइन, पशुचौपायाको जीवन पनि समस्यामा परेको छ । जिल्लामा बाढीका कारण विस्थापित नागरिक भोकै बस्नुपरेको छ भने पशुचौपायासमेत आहाराको अभावले मर्ने अवस्थामा पुगेका छन् ।
शनिबार आएको बाढीले भजनी नगरपालिका सबै भन्दाबढी प्रभावित भएको थियो । जहाँ हजारौं परिवार वस्तुभाउसहित सडकमा छन् । सडकमा मानिससँगै वस्तुभाउ पनि भोकै बाँधिएका छन् ।

बाढीका कारण तीन जनाको ज्यान गएको छ । बाढीमा डुबेर भजनी नगरपालिका–८ गोडचौराका ५५ वर्षीय कालुराम चौधरी र वडा नं ९ का २५ वर्षीय विनोद राजीको मृत्यु भएको छ । यस्तै धनगढी उपमहानगरपालिका–१३ की १९ वर्षीया नवीना चौधरीको पनि डुबेर मृत्यु भएको हो ।

बाढीले भजनीका नागरिकको जनजीवन अस्तव्यस्त छ । घर बाढीले डुबेको छ, घरमा भएका अन्नपात, लुगाकपडा बगेका छन् भने धान लगाएको खेत पनि डुबान र कटानले क्षति भएको छ । विस्थापित भएका नागरिकलाई आफ्नो पेटको जोहो गर्न त गाह्रो छ त्योसंगै वस्तुभाउलाई के खुवाउने भन्ने पिरलो ।

भजनी–८ सोनाहाफाँटा खल्लाटोलीकी तुल्सीदेवी विक वस्तुभाउसहित हुलाकी सडकमा बसेका छिन् । विक आफू चाउचाउ र चिउराको भरमा छिन् उनका का वस्तुभाउ उनीजस्तै भोकै छन् ।

“वस्तुभाउका लागि जोहो गरिराखेको गहुँको भुस्सा बाढीमा बग्यो, धानखेत अहिले पनि जलमग्न छ । अब घाँस पनि बाढीले नोक्सान भयो, आफू पनि भोकै, वस्तुभाउ पनि चार दिनदेखि सडकमा भोकै छन् । यस्तै हो भने कति दिनसम्म बाँच्न सकिएला ।” उनले पीडा सुनाईन् ।

भजनी नगरपालिकाका पशु शाखा प्रमुख हरिलाल जैसी बाढीले पशुवस्तुतर्फ क्षति भएका विवरण आइरहे पनि कति क्षति भयो भनी भन्न सक्ने अवस्था नभएको बताए। उनले पशु बगेका, मरेका कुरा आइरहे पनि प्रभावित क्षेत्रमा अझै जान नसकिएकाले एकिन तथ्याङ्क आएको छैन । “हामी पशुभन्दा मानिस कसरी जोगाउने भनी उद्धारमा खटेका छौँ, अझै मानिसकै उद्धार भइरहेको छ ।”

पहिलो चरणमा मानिस उद्धार र राहतका काम भइरहेकाले पशुको आहाराबारे केही उपाय नै सोचेनौ प्रमुख जैशी भने । पालिकामा भएको आहाराको स्रोत सबै बाढीले नोक्सान गरेकाले पशुको आहारा व्यवस्थपान गर्न सक्ने अवस्था नरहेको उनले बताए ।

उनले आजबाट पशुतर्फ भएको क्षतिको विवरण सङ्कलन गर्ने तयारी गरिएको बताए । “अझै गाउँ जलमग्न छन्, गाउँमा गएर विवरण लिनसक्ने अवस्था छैन, धेरै मानिसका वस्तुभाउ बगेका, बङ्गुर मरेका, कुखुरा मरेका खबर आएका छन् । अब हामी तथ्याङ्क लिन्छौँ ।”