धनगढी, ३० फागुन । नेपालभरका उपमहानगरपालिकामा धनगढी उत्कृष्ट उपमहानगर भएको छ । धनगढीले संस्थागत विकास, सेवा प्रवाह र वित्तिय सुशासनका क्षेत्रमा सबभन्दा राम्रो काम गरेकाले उत्कृष्ट उपमहानगरपालिका भएको हो ।

देशकै उत्कृष्ट उपमहानगर घोषीत धनगढी उपमहानगरपालिकालाई नेपाल नगरपालिका संघले उत्कृष्ट नगरको रुपमा आज काठमाडौं एक कार्यक्रमका बीच पुरस्कृत गर्न लागेको छ ।

देशकै उत्कृष्ट उपमहानगर हुन सफल धनगढी उपमहानगरलाई आज अपरान्ह काठमाडौंको लैनचौरस्थित द मल्ल होटलमा नेपाल नगरपालिका संघको ३० औं वार्षिकोत्सवको अवसरमा प्रधानमन्त्री पुष्पकमल दाहाल ‘प्रचण्ड’ले सम्मान गर्ने जनाइएको छ ।

उत्कृष्ट उपमहानगरमा पर्न सफल भएर पुरस्कृत हुने भएपछि धनगढी उपमहानगरपालिकाका मेयर गोपाल हमाल पुरस्कार तथा सम्मान लिन काठमाडौं गएको उपमहानगरपालिकाले जनाएको छ ।

नेपाल नगरपालिका संघ सम्पूर्ण नगरपालिकाहरूको प्रतिनिधिमूलक संस्थाको रुपमा २०५० मा स्थापना भई नगरपालिकाहरूको साझा मुद्दा र हकहितको सवालमा वकालत र पैरवी गर्दै आएको संस्था हो ।