धनगढी, ४ वैशाख । सुदूरपश्चिममा केही दिनयता कोरोना संक्रमण बढेको छ । विगत १३ दिनको अवधिमा दुई सय ५८ जनामा कोरोना संक्रमण देखिएको तथ्यांक छ भने संक्रमित एक जनाको मृत्यु भएको छ ।

नयाँ वर्ष र बिसु मनाउन भारतबाट घर फर्कनेहरु बढेसँगै कोरोना संक्रमण देखिन थालेको हो । यहाँ कोरोना संक्रमण देखिएकामध्ये अधिकांश भारतबाट फर्केकाहरु हुन् ।

सुदूरपश्चिम प्रदेश स्वास्थ्य निर्देशनालयका अनुसार गत २१ चैतयता दुई सय ५८ जनामा कोरोना संक्रमण पुष्टि भएको छ । तीमध्ये एक सय ९२ जनामा नाकामै गरिएको परीक्षणमा कोरोना संक्रमण देखिएको निर्देशनालयका कोरोना सम्पर्क व्यक्ति हेमराज जोशीले जानकारी दिए ।

अहिले भारतमा कोरोना संक्रमण बढेकाले त्यहाँबाट फर्कनेहरुमा पनि संक्रमण देखिन थालेपछि सुदूरपश्चिममा पनि संक्रमण दर बढेको जोशीले बताए । केही दिनअघिसम्म सुदूरपश्चिममा संक्रमण दर शून्य थियो ।