काठमाडौं । सशस्त्र प्रहरीको एपीएफ क्लबले कोशी प्रदेशलाई हराउँदै प्रधानमन्त्री कप महिला टी-२० राष्ट्रिय क्रिकेट प्रतियोगिताको उपाधि जितेको छ।

काठमाडौंको कीर्तिपुरस्थित त्रिवि क्रिकेट मैदानमा बुधबार भएको फाइनल खेलमा एपीएफले कोशी प्रदेशलाई ११ रनले पराजित गरेको हो। एपीएफले दिएको ११५ रनको लक्ष्य पछ्याउने क्रममा कोशी प्रदेश तीन विकेटको क्षतिमा १०३ रनमा समेटियो।

कोशीका लागि रुबिना क्षेत्रीले ६२ र काजल श्रेष्ठले २२ रन बनाए। अन्य खेलाडीले दोहोरो अंक पनि जोड्न सकेनन्।

एपीएफका लागि करुणा भण्डारी र सीता राना मगरले एक-एक विकेट लिए भने अन्य खेलाडीले पनि कसिलो बलिङ गरे।

यसअघि ब्याटिङ गरेको एपीएफले सात विकेटको क्षतिमा ११४ रन बनाएको थियो। एपीएफका लागि इन्दु बर्माले ५३, ज्योति पाण्डेले २७ र रोमा थापाले १४ रन बनाए।

कोशीका लागि अप्सरा बेगमले तीन, अलिशा खडियाले दुई, रुबिना क्षेत्री र निशा शाहले एक-एक विकेट लिए।