काठमाडौं । दिक्तेल रुपाकोट मझुवागढी नगरपालिकाले ‘नगरको सान दिक्तेलको स्वाभीमान, मुन्दुम अन्तर्राष्ट्रिय चित्रकता संस्कृतिको सम्मान’ भन्ने मूल नाराका साथ मुन्दुम अन्तर्राष्ट्रिय चित्रकला प्रदर्शनी २०८० हुदैछ ।

नेपाल कला परिषद (नेपाल आर्ट काउन्सिल) बबरमहल काठमाडौँमा यही फागुन ५ गतेदेखि १७ गतेसम्म चित्रकला प्रदर्शनी हुने आयोजकले जनाएको हो । प्रदर्शनीमा राष्ट्रपति रामचन्द्र पौडेलले उद्घाटन गर्ने नगरपालिकाका नगरप्रमुख तीर्थराज भट्टराईले जानकारी दिए ।

प्रदर्शनीमा ५० देशका चित्रकारले बनाएका १७० भन्दा बढी चित्रहरु राखिनेछन् । जसमा दिक्तेल रुपाकोट मझुवागढी नगरपालिका लगायत खोटाङ जिल्लाका समग्र सांस्कृतिक, धार्मिक र पर्यटकीय क्षेत्रका तस्वीर रहने आयोजकको दाबी छ ।

नगरपालिकाले १९ जना विदेशी र २४ जना स्वदेशीगरी ४३ जना चित्रकारको सहभागितामा जिल्लाका विभिन्न क्षेत्रको अवलोकन गराइएको थियो । जहाँ स्थानीय स्तरका सांस्कृतिक, धार्मिक र पर्यटकीय क्षेत्रको प्रचारप्रसारकोलागि १०९ वटा जिवन्त चित्रहरुहरुको लाइभ भएको थियो ।

उक्त प्रदर्शनीको अवसरमा राई, नेवार, गुरुङ, क्षेत्री बाहुन लगायत जातजातिका सांस्कृतिक झाँकीसमेत प्रदर्शन गरिने नगरप्रमुख भट्टराईले बताए ।