कैलाली । आज बडादशैंको मुख्य दिन, मान्यजनको हातबाट नवदुर्गाको प्रसादका रूपमा टीका र जमरा लगाइन्छ। नेपाल पञ्चाङ्ग निर्णायक विकास समितिले टीकाको उत्तम साइत बिहान ११:५१ बजे रहेको जनाएको छ। यद्यपि‚ सामान्य मानिसले साइत खोज्नु नपर्ने समितिका अध्यक्ष प्राध्यापक श्रीकृष्ण अधिकारीले बताए।

“राज्य सञ्चालकले भने साइतमै टीका लगाउनुपर्छ,” उनले भने‚ “राज्य सञ्चालकले शुभ साइतमा टीका लगाउँदा प्रभु, मन्त्र र उत्साहशक्ति प्राप्त हुने शास्त्रीय वचन रहेकाले साइत दिइएको हो, साइतमै टीका लगाउँदा देवीको शक्ति प्राप्त हुन्छ।”

घटस्थापनाका दिन स्थापना गरिएको घडाबाट वैदिक विधिपूर्वक अभिषेक गरी विजयादशमीको टीका लगाइन्छ। आश्विन शुक्ल दशमीका दिनमा मनाइने विजयादशमी पर्व आज हर्षोल्लासका साथ टीका, जमरा थापेर मनाइन्छ।