कैलाली । दशैं आएपनि कैलालीका किसान यतिबेला खेतमा पाकेको धानबाली भित्र्याउन भ्याइनभ्याइ भएको छ । किसानले वर्षाको समयमा रोपेको धानबाली भित्रियाउनमा नै व्यस्त देखिन्छन् । मौसममा फेरबदल देखिन थालेपछि उनीहरु दशैं पर्वलाई व्यवास्त गरि धानबाली भित्र्याउन भ्याइनभ्याइ भएको बताउँछन् ।

धनगढी उपमहानगरपालिका–२ भन्सार कटानका किसान नरबहादुर विष्टले खेतमा धान लटरम्म पाकेर बाली झर्ने अवस्थामा पुगेको र मौसममा पनि कतिखेर बादल लाग्न थालेपछि आफूले वर्षभरिका लागि जोहो गरेर खाने अन्न बिग्रिने भन्दै चिन्ता व्यक्त गर्छन् ।

उनले भने, “हिजोआज घरको सबै काम छोडेर खेतमै बढी समय बित्ने गरेको छ, झिसमिसे अँध्यारो समयसम्म खेतमै हुन्छौँ र बिहान पनि सबेरै खेतमा जान्छौँ ।” केही दिनदेखि बादल लागेर पानी पर्ने जस्तो मौसम देखिन थालेपछि लगानी र परिश्रम खेर जाने हो कि भन्दै यहाँका अधिकांश किसानका मनमा एक किसिमको चिन्ता हुन थालेको छ ।

खेतमा धान काट्दै गरेका धनगढीको बडहराका किसान सुकराम चौधरीले मौसम खराब देखिन थालेपछि राति अबेरसम्म पनि धान भित्र्याउनका लागि थ्रिसेरको पालो कुर्नुपरेको दुःखेसो पोख्नुभयो । धान थ्रेसर गर्नका लागि पालो पर्खिंदासमेत धान थ्रेसर गर्ने किसानको चापका कारण मेसिन नपाएरै फर्कनु परेको उनले बताए ।

हातैले धान काट्ने र धानको मुठा चुटेर परम्परागत तरिकाले धान भित्र्याउने गरेका किसान यतिबेला मौसमी गड्बडीका कारण आधुनिक उपकरण प्रयोग गरी धान भित्र्याउन लागिपरेका छन् ।