बैतडीमा मतदान अधिकृत र सहायक मतदान अधिकृत तोकिए
बैतडी, २४ कात्तिक । बैतडीमा मतदान अधिकृत र सहायक मतदान अधिकृत तोकिएका छन् । आसन्न प्रतिनिधि र प्रदेश सभा निर्वाचनका लागि २ सय १० ओटा मतदान केन्द्रमा खटिने मतदान अधिकृत र सहायक मतदान अधिकृत तोकिएका हुन् ।

२ सय १० ओटा मतदान केन्द्रमा खटिने मतदान अधिकृत र सहायक मतदान अधिकृत तोकिएका जिल्ला निर्वाचन अधिकारी माधवप्रसाद फुँयालले जानकारी दिए । २ सय १० ओटै मतदान केन्द्रमा मतदान अधिकृत र सहायक मतदान अधिकृत तोकिएका र तालिम दिने तयारी भइरहेको उनले बताए ।

यहि कार्तिक २६, २७ र २८ गते मतदान अधिकृत र सहायक मतदान अधिकृतहरुका लागि तालिम सञ्चालनको तयारी भएको उनले बताए । उनका अनुसार पुर्चौडी नगरपालिका, सिगास गाउँपालिका र डिलाशैनी गाउँपालिकामा खटिनेको तालिम २६ गते राखिएको छ ।

यस्तै पञ्चेश्वर, शिवनाथ गाउँपालिका, मेलौली नगरपालिका, सुर्नया गाउँपालिका र पाटन नगरपालिकाको वडा नं ७ , ९ र १० मा खटिने मतदान अधिकृत र सहायक मतदान अधिकृतको तालिम २७ गते राखिएको छ । यसै गरि २८ गते पाटनको १ देखि ६ वडा र दोगडाकेदार गाउँपालिकामा खटिने मतदान अधिकृत र सहायक मतदान अधिकृतको तालिम राखिएको हो । मतदान अधिकृत र सहायक मतदान अधिकृतको तालिम बिरेन्द्र मावि साहिलेकमा हुने बताइएको छ ।

तालिमपछि उनीहरुलाई नियुक्ती दिएर कार्यस्थलमा खटाइने जिल्ला निर्वाचन अधिकारी फुँयालले बताए । निर्वाचनका लागि आवश्यक पर्ने निर्वाचन सामग्री पनि जिल्ला आइपुगेको निर्वाचन कार्यालयले जनाएको छ ।