कैलाली ३ माघ । सुदूरपश्चिम प्रदेशको उपसभामुखमा एमालेका कोइलीदेवी चौधरी निर्वाचित भएका छिन् ।

कैलालीबाट समानुपातिक प्रदेशसभा सदस्य भएका उनी मंगलबार भएको मत विभाजनबाट उपसभामुखमा चयन भईन् ।

माओवादीका लक्ष्मी बिकले चौधरीलाई उपसभामुखमा निर्वाचित गरियोस् भनेर प्रदेशसभामा पेश गरेको प्रस्तावको पक्षमा २८ मत परेसँगै उनी चयन भएकी हुन् । प्रस्तावको विपक्षमा २३ मत मात्रै खसेको थियो ।

चौधरीलाई नेकपा एमालेका १०, माओवादी केन्द्रका १०, नागरिक उन्मुक्ति पार्टीका ७ र राप्रपाका १ जना प्रदेशसभा सदस्यले मतदान गरेका थिए ।

मंगलबार बिहानै बसेको प्रदेशसभाको बैठकले सभामुखमा माओवादी केन्द्रका भीमबहादुर भण्डारीलाई निर्वाचित गरेको थियो । उपसभामुख नागरिक उन्मुक्ति पार्टीको भागमा परे पनि उम्मेदवारी भने परेन ।