काठमाडौं, ४ असोज । कार्यवाहक प्रधानमन्त्री पूर्णबहादुर खड्काले आन्दोलनरत शिक्षकका माग पूरा गर्न सरकार तयार रहेको बताए ।

बिहीबार नेपाली कांग्रेस केन्द्रीय कार्यसमितिको बैठकमा बोल्दै खड्काले अहिलेको अर्थतन्त्रले धान्न सक्ने जुनसुकै मागका विषयमा पनि छलफल गर्न सरकार तयार रहेको बताए।
उनले भने, “अहिलेको अर्थतन्त्रले तत्काल धान्न नसक्ने कुरा र संविधानले गरेको व्यवस्थाभन्दा प्रतिकूल हुने कुरामा सहमति गर्न सक्ने अवस्था छैन। त्यस बाहेक जुनसुकै विषयमा छलफल गर्न सरकार तयार छ।”

शिक्षा र शिक्षकका समस्या समाधान गर्ने विषयमा छलफल गर्न सरकार तयार रहेको उनको भनाइ थियो। खड्काले भने, “ऐन, नियमावली र कार्यविधिमा व्यवस्था गरेर समस्यालाई समाधान गर्न छलफल गर्न सरकार तयार छ।”