कञ्चनपुर । सुरक्षित अवासकालागि शुक्लाफाँटा नगरपालिकाले साढे दुईसय परिवारलाई अनुदान दिएको छ । गरिबीको रेखामुनि रहेका परिवारलाई मर्यादित जीवन जिउन नगरपालिकाले सुरक्षित आवास निर्माणको लागि अनुदान रकम उपलव्ध गराएको हो।

पालिकाले पराल, खर, स्याउला र टायलका छाना भएका घरमा जस्तापाता राख्न सुरक्षित नागरिक आवास कार्यक्रमअन्तर्गत अनुदान प्रदान गर्दै आईरहेको छ । सो कार्यक्रम अन्तर्गत छाना फेर्न निवेदन दिएका दुई सय ५४ परिवारलाई अनुदानको रकम बैंक मार्फत उपलब्ध गराइएको नगरपालिकाले जनाएको छ।

पहिलो चरणमा प्रथम किस्तावापत एक सय ११ परिवार, दोश्रो चरणमा ५५ परिवार र तेश्रो चरणमा ८८ परिवारलाई रु ३० हजारका दरले अनुदान रकम उपलव्ध गराइएको पालिकाले जानकारी दिए ।

पालिकाले छाना फेर्न अधिकतम रु ५० हजार दुई किस्तामा उपलब्ध गराउने प्रावधान बनाएको छ ।