कैलाली । कैलालीको जानकी गाउँपालिका–९ अमरावतीमा एक वृद्धा महिलाको शब फेला परेको छ । उनको शरिरमा धारिलो हतियार प्रयोग गरिएको चोट देखिएको छ ।

८० वर्षीया माता देवी शाहीको शव मंगलबार बिहान सवा ८ बजे आफ्नै घरको सुत्ने कोठामा खाटमा मृत फेला परेको जिल्ला प्रहरी कार्यालय कैलालीका प्रवक्ता तथा प्रहरी नायब उपरीक्षक (डीएसपी) राजकुमार सिंहले जानकारी दिए।

उनका अनुसार बृद्धा महिला आफ्नै दुईतले घरको माथिल्लो तलामा एक्लै बस्दै आएकी थिइन्। प्रारम्भिक अनुसन्धानअनुसार उनको छातीमा धारिलो हतियारले प्रहार गरिएको र घाँटीमा समेत चोट लागेको प्रहरीले जनाएको छ।

हत्या कसले र किन गरेको भन्ने विषयमा अझै खुल्न सकेको छैन। अनुसन्धानको सिलसिलामा तालिमप्राप्त कुकुरको सहयोग लिइएको छ । मृतकको शव पोष्टमार्टमका लागि टीकापुर अस्पतालमा पठाइएको छ । भने घटनाबारे थप अनुसन्धान भईरहेको प्रहरीले जनाएको छ।