कैलाली । सुदूरपश्चिम प्रदेश सरकारले प्रदेशको कुल जनसंख्याको ९५ प्रतिशत जनसंख्या साक्षर रहेको दावी गरेको छ ।

प्रदेशमा पढ्न, लेख्न सक्ने ९५ प्रतिशत जनसंख्या हुनु भनेको सरकारले मुख्य उपलब्धी रहेको दाबी गरेको हो । मुख्यमन्त्री कमल बहादुर शाहले मंगलबार ३५ बुँदे एक वर्षे उपलब्धी सार्वजनिक गर्दै सो कुरा बताएका हुन् ।

उनले भने, ‘सुदूरपश्चिम प्रदेश सरकारले कार्यान्वयनमा ल्याएको साक्षर नेपाल अवधारणा पत्रको उपलब्धी स्वरुप प्रदेशका १५ देखि ६० वर्ष उमेर समूहका साक्षर नागरिकहरुको संख्या औषतमा ९५ प्रतिशत पुगेकोले सुदूरपश्चिम प्रदेशलाई साक्षर प्रदेश घोषणा गरिएको छ ।
राष्ट्रिय जनगणना २०७८ को तथ्यांकअनुसार सुदूरपश्चिमको जनसंख्या २६ लाख ९४ हजार सात सय ८३ नाघेको छ ।

प्रदेश सरकारको तथ्यांकअनुसार नौवटै जिल्लाको जिल्लागत साक्षरता दर ९५ प्रतिशतभन्दा माथि रहेको छ । तथ्यांकअनुसार दार्चुलाको साक्षरता दर ९५।४० रहेको दाबी गरिएको थियो । भने, बाजुराको साक्षरता दर प्रदेशमा सबैभन्दा बढी ९७।३१ प्रतिशत छ । बाजुरालाई असार ०७९ मा साक्षर घोषणा गरिएको थियो । बैतडीको साक्षरता दर ९६.५३, डडेल्धुराको ९८.८, बझाङको ९५.६०, डोटीको ९६.५५, अछामको ९५.५५, कैलालीको ९६.२० र कञ्चनपुरको साक्षरता दर ९६.२१ प्रतिशत रहेको दाबी गरिएको छ ।